I.E.S.O. Nava

CONCURSU DE RELLATOS CURTIOS DE LA COMARCA

2006-06-16T11:28:00.000+02:00

El xueves 16 de xunu a les siete de la tarde dieronse los premios del VIII Concursu lliterariu de rellatos curtios de la Comarca de la Sidra na Casa de la Cultura de Bimenes.

Los ganadores del concursu son:

* Na modalidá A): El primer premiu al rellatu " Mío güela y Lolo" de Yesica Corugedo, de Suares ( Bimenes) y como finalistes d´esta modalidá los siguientes rellatos:" El Club de las Tres R: Reduce, Reutiliza,Recicla",
fecho por María Sánchez Ordóñez, de Suares ( Bimenes) y " El Día de las Tortugas", fecho por Marcos Vázquez Prada, de Nava.

* Na modalidá B): Los finalistes son " Hermanas a la carrera", fecho por Gonzalo Llamedo Pandiella, de Nava y " Yusuf mi amigo", fecho por Miguel Carneado Merelo, de Villaviciosa.

Si quies ver les semeyes del actu, calca equí.

XXVII Selmana de les lletres asturianes

2006-05-24T19:50:00.000+02:00

Bono, esto yá entama goler a fin de cursu. Dientro nada evaluaciones, notes, solín, y acabóse'l cursu 2005/2006. La selmana les lletres d'esti añu tamién pasó, pero enantes que too esto asoceda tovía vos tengo preparao dalgo.

Si tas folgazán en casa o nel institutu, pues facer estes xeres rellacionaes col teatru asturianu, calca equí.

Espero que deprendas abondo y que pasarás un bon ratu.

POEMES

2006-03-01T12:17:00.000+01:00

Quixera ser el sol
del murniu corazón
que vea
l’horizonte col rebañu
del perru pastor
namái que se fixa
nes estrelles de la nueche
y creer que son cometes
surdiendo del horizonte.

POEMES

2006-03-01T12:14:00.000+01:00

Anueche tuve dibuxando
un prau brillante,
mientres l’amor taba entamando,
y el cielu taba brillando,
cuando oí que lu amabes,
quixe tirame al mar.

POEMES

2006-03-01T12:09:00.000+01:00

Siento l’aire del amor,
cuando entama a pasear el sol,
que dibuxa un mar brillante.
¡¡Cielu!!Quiero ser el to amante.

Luis R.

POEMES

2006-02-14T14:20:00.000+01:00

LA BAILARINA MURNIA.

Quixera ser bailarina
de la murnia danza
que baila
nel horizonte xunto
al prietu perru
namai que lladra
cuando llega la nueche,
y cree que son dances
surdiendo de la escuridá.

PRESENTACIÓN DE LOS ALUMNOS de 1 ESO

2006-01-13T20:24:00.000+01:00

Equí tenéis los trabayos fechos por Navidá polos escolinos de primeru de la ESO.
Si queréis ver les semeyes de les tarxetes navideñes, pinchái equí.
Si queréis ver les vuestres semeyes, calcái equí.

PRESENTACIÓN DE LOS ALUMNOS de 2 ESO

2006-01-13T20:00:00.000+01:00

Los alumnos de primeru y segundu de la ESO participaron nel III Concursu de Cómic n´asturianu convocáu pol Conseyu de Política Llingüística Comarca de la Sidra.
Esti vienres día 3 de febreru a les 19 hores na Casa la Cultura de Bimenes van entregase los premios del III Concursu de Cómic n'asturianu y del I Concursu de Tires Cómiques de la Comarca la Sidra que son organizaos pol Serviciu de Mocedá de la Mancomunidá Comarca de la Sidra y el Serviciu de Normalización Lligüística de la Comarca la Sidra.
Los premiaos nesta ocasión son:

MODALIDÁ 1: Cómic n'asturianu, dirixío a autores/as mayores de 14 añosPremiu de 500 euros y Diploma a la obra titulada:
"OCHO VALLES" l' autor premiáu ye JOSÉ JUAN GONZÁLEZ GARCÍAç
El xuráu concedió dos accésit de 200 euros y Diploma a:DAVID LAFUENTE y a TOMÁS GONZÁLEZ CANELLADA.

MODALIDÁ 2: Tires Cómiques, feches per alumnos/es d'enseñanza primaria y secundaria de los distintos centros educativos de la Comarca la SidraCategoría del Ciclu Primeru y Segundu de Primaria:
Premiu Primeru pa MÓNICA ARCE COSTALES del Colexu Públicu Maliayo de Villaviciosa.
Categoría del Ciclu Terceru de Primaria:Primer Premiu pa CLAUDIA MIRAVALLES GONZÁLEZ del Colexu Públicu Maliayo de Villaviciosa.

Categoría d'Enseñanza Secundaria Obligatoria:Premiu Primeru pa MARIA SÁNCHEZ DÍAZ de Bimenes.
Les finalistes foron:Los finalistes fueron:

YESICA CARUJEDO MONTES de Bimenes por "Polinización o contaminación?"
JOHANA GONZALEZ GONZALEZ por "Mio perru"
MARCOS VÁZQUEZ PRADA de Nava por "Bona Vecindá"
EVA MONTES COLÍA de Bimenes por "Vida nel campu"
MARÍA SÁNCHEZ ORDÓÑEZ de Bimenes por "¡Una pinta molona!"

Nel actu tamién se va inaugurar una esposición coles obres presentaes a concursu asina como la entrega d'una espublización coles obres premiaes y les finalistes.

Si quies ver delles semeyes de los alumnos d´esti cursu, calca equí.
Pincha equí, si quies ver les semeyes del concursu.

PRESENTACIÓN DE LOS ESCOLINOS DE 3 ESO

2006-01-13T19:48:00.000+01:00

Si quies ver les semeyes de los alumnos de terceru de la ESO, calca equí.
Pero si quies ver les semeyes del Muséu de la Sidra, calca equí.

TALLER LLITERARIU N´ASTURIANU

2005-12-29T13:28:00.000+01:00

TESTOS LLITERARIOS

Los testos que vemos darréu tán fechos na clas, la propuesta foi que los escolinos debíen siguir la historia entamada, teníen que facela ensin papel y col ordenador, el tiempu estimáu ye d´una hora.
A partir d´una mesma propuesta de trabayu, caún respondió d´un mou orixinal, comprobando que toos somos capaces d´escribir y de contar histories más o menos lliteraries.

LLUVIA DE ESTRELLES

De la que s´escuchaben los toques de les once la nueche, salía pela ventana del so cuartu Xuan, al que yá taba esperando agacháu Pedro. Xuntos, y teniendo munchu curiáu de que naide los viera, empobinaron pal sitiu onde quedaron con Tina y Dani pa dir al prau y esperaron tola nueche pa ver la lluvia d´estrelles ,que yera a les doce y media, pero teníen tantu suañu que se quedaren nel prau dormíos dempués de ver la lluvia d´estrelles.
Al otru día taben tolos pas preocupaos porque los sos fios nun taben en casa. Pero a la ma de Tina dio-y por mirar el móvil y había un mensaxe de Pedro que-y dicía a les doce nel prau.
Entós aviso a los demás pas y fueren a buscalos. Foi tanta la riña que nun salieren más de nueche perehí.

MARIA ELENA 4B

TESTU 2 :

De la que s´escuchaben los toques de les 11 la nueche, salía pela ventana del so cuartu Xuan, al que yá taba esperando agacháu Pedro. Xuntos, y teniendo munchu curiáu de que naide los viera, empobinaron pal bar del güelu de Xurde que quedó con él ellí pa salir de folixa. Namás llegar al bar alcontraronse con él zarráu y Xurde, muertu de fríu, esperándolos fuera.
Cunto-yos que so pá y so ma tuvieron una discusión mui gorda nel bar y el güelu tuvo que zarrar pa que les llinguateres del pueblu nun lo publicasen perehí.
A Pedro y a Xuan dio-yos muncha pena de Xurde y pa que nun s´amargase en casa marcharon los tres pa Uviéu, pero namás llegar tuvieron que marchar porque alcontraronse ellí a los pas de Pedro y Xuan, y mandarolos pa casa con un bon castigu y nun se-yos volvió a ver el pelo na cai polo menos nunos cinco meses. En tou esi tiempu nun se supo más de Xurde hasta qu´ un bon día dio-yos por buscalu y alcontraronse con que Xurde marchara con so pa pal estranxeru y que nunca más lu diben ver.
BEA

TESTU 3:

De la que s´ escuchaben los toques de les once la nueche, salía pela ventana del so cuartu Xuan, al que yá taba esperando agacháu Pedro. Xuntos y teniendo munchu curiáu de que nadie los viera , empobinaron pal monte qu´había en frente de la so casa y mandaron al perru dir buscar un piescu y él taba mui llocu y traxo-yos un plátanu y pa enriba taba magurientu –dixo Pedro. Esti perru ta como una maniega, ye más malu, ellos garraron el plátanu y metieronlu n´oruxu y fixeron un llicor de plátanu que se chupaben los deos.

Alvaro

Testu 4:

De la que s´escuchaben los toques de les once la nueche, salía pela ventana del so cuartu Xuan, al que yá taba esperando agacháu Pedro. Xuntos y teniendo munchu curiáu de que nadie los viera, empobinaron pal baxu que teníen a escondíes, ya que los sos pas nun los dexaben alquilalu. Consiguieron dir anque con muncha dificultá. Pasaron la tarde xuntos con cuatro amigos y tuvieron viendo la tele hasta qu´ oyeron la puerta. Pusieronse mui nerviosos y nun quisieron abrir, pero forzaron la cerradura y abrieron la puerta. Yeren los pas de toos. Xuan y Pedro, que fueron los únicos que fueron al baxu ensin permisu, marcharon pa casa y quedaron los dos castigaos.

Isa

EL CASTIELLU LA VIEYA

De la que s´escuchaben los toques de les once la nueche, salía pela ventana del so cuartu Xuan al que yá taba esperando agacháu Pedro. Xuntos y teniendo munchu curiáu de que nadie, los viera empobinaron pal castiellu de la vieya del pueblu al que tolos neños temíen.

Delantre del castiellu dieronse cuenta de que yera la primera vegada que Pedro y Xuan salíen de casa ensin permisu.

Namás llegar al castiellu Pedro saco de la mochila unes llitrones y una botella de martiní y empezaron a beber como gochos tanto que yá veíen una vieya peles escaleres fumando porros asina que Xuan metió-y con una botella na cabeza y quitaron-y los porros.
Y acabaron con un morao de la lleche n´hospital.

Borja

Testu 6:

De la que s´escuchaben los toques de les once la nueche, salía pela ventana del so cuartu Xuan , al que yá taba esperando agacháu Pedro. Xuntos y teniendo muncho curiáu de que naide los viera, empobinaron pal campu de fútbol onde taben xugando los xuveniles de Nava con llinternes de los mineros, na tiesta, el partíu diba 0-2 cuando llegaron y pusieronse a animar al Ribadedeva que diba ganando. Sergio que los oyó animar al contrariu, taba mediu llocu y salto pela varandiella y pego-yos una pequeña paliza y dixo-yos qu´animasen a Nava o saltaba otra vez y entós non sólo diba da-yos una paliza sinón que-yos diba cortar les pates. Sergio volvió a entrar nel campu y el so entrenador dixo-y que nun pisara la raya que diba caer del muriu y diba tar él debaxo esperándolu. Entós Sergio volvióse más llocu tovía y subió la banda como un perru y marco ocho goles nun cuartu d´hora y pegose col equipu contrariu él solu y matolos a toos.

Christian

AVENTURES NEL PARQUE

De la que s´escuchaben los toques de les once la nueche, salía pela ventana del so cuartu Xuan al que yá taba esperando agacháu Pedro. Xuntos y teniendo munchu curiáu de que nadie los viera, empobinaron pal parque y ellí tuvieron tola nueche falando y cuidando de los neños más pequeños qu´había perellí. Quedaronse nel parque hasta ´l riscar cuando de sópitu se llevantaron porque escucharon un ruiu mui raru. Toos echaron a correr alcontraronse con un paisanu que-yos pregunto que vos pasa, pero ellos siguieron y nun-y dixeron ná.
Pa finar too quedo nun sustu y caún foi pa la so casa.

Cristina

DE FOLIXA TOLA NUECHE

De la que s´escuchaben los toques de les once de la nueche, salía pela ventana del so cuartu Xuan,al que yáa taba esperando agacháu Pedro. Xuntos y teniendo munchu curiáu de que naide los viera, empobinaron pal ríu onde taben los sos collacios con 50 llitros de cerveza y 25 llitros de vinu.Vaya nueche, de llocura y desenfrenu, que nos esperaba.
A les tres de la mañana yá nun teníamos bebida, acabamos como perros, pero lo más fastidiáu ye que nun nos alcordábamos de ná. Al día siguiente teníamos una resaca como animales,tuvimos tola tarde tiraos pelos praos dormiendo y picaronnos tolos bichos del prau.
Pa finar fiximos un pactu de que nunca dibamos a traer tanta bebida.

Xandru.

SI QUEREIS VER LES SEMEYES DE LOS ALUMNOS DE 4 DE LA ESO DE LLINGUA Y LLITERATURA ASTURIANA , pinchái equí.

2005-12-29T13:08:00.000+01:00

CONCURSU DE CUENTOS

Nel institutu fízose un concursu de cuentos de Navidá, pero había una condición y ye que na historia deben apaecer les siguientes pallabres:

“ Osu pardu, casadielles, carrascu, furacu nel calcetín, billete d´avión, Fernando Alonso, pulgues, esame de ciencies, bocadillu de chorizu, mensaxe, camión de la basura”.

Los cuentos que ganaron foron los siguientes:

ESPEDICIÓN PER NAVIDÁ

Va cuantayá per Navidá fiximos una escursión nel colexu cola profesora de Llingua Asturiana. Dibemos tola clas a facer senderismu y tamién la xefa d´estudios.
Xusto la selmana dempués de Reis había que facer un esame de Ciencies col tema de fauna.
Salimos del institutu y cuando nos quiximos dar cuenta yá tábamos metíos naquel camín de piedres, que malpenes se víen ente la nieve.
- A ver, toos al sitiu- glayó la profe.
El picatueros esnalaba y emburriaba cola pata ´l troncu del carrascu neváu.
Les llebres facíen saltos y picosrabucos lloques de contentes. Les pulgues que viven na cabeza del osu pardu daben vueltes y vueltes naquel revoltixu, ordenando les idees col fríu.
Siete minutos duró aquello, hasta que dixo la xefa d´estudios.
-¿Qué ye esto?
-¿Qué pasa equí?
Hubo un gran silenciu, hasta que Fran alzó la mano:
- Mayestra ¿equí hai elefantes?
- Bono – dixo la xefa d´estudios, ta visto que´l viaxe va ser un éxitu.
Agora vamos a pasiar pela viesca y llueu baxamos a comer los bocadillos de chorizu al llau d´aquel llagu y facemos un muñecu de ñeve toos xuntos.
¿ Sabéis dalgún xuegu imaxinativu?- preguntó la mayestra.
- Non, yo nun sé ná- dixo Naser.
Voi deprendevos a xugar al de les eleiciones- díxo-y a María.
¿ Qué clas de xuegu ye?- entrugó la xefa d´estudios.
- La xente divídese en dellos grupos. Unos voten pa Xuan, otros pa Xosé y otros pa Xulio. Dempués cuenten los votos y el que tien más gana.
- ¿Qué gana?- dixo Rocío.
Tóca-y gobernar por varios años.
Paez divertíu, yo quiero votar- dixo Fran.
Si vierais l´entusiasmu con que pinten carteles, peguen fiches, reparten propagandes y griten “ Viva Xuan, abaxo Xulio”.
¿Griten toos eso?
Non, eso grítenlo unos. Los otros griten viva Xulio, abaxo Xuan y peguen nes parés semeyes grandes de Xuan y de Xulio.
-¿Pa qué peguen les fotos?- preguntó Naser.
Pa qu´otros vayan, pinten bigotes y asina diviértense toos.
- Mayestra, esti ta quedándose con nosotros.
Llevántense un montón de manes, cuasi tola clas.
¿Qué casa ye la qu´hai detrás d´aquel matu?
La de Fernando Alonso- dixo la mayestra.
Yo saqué les casadielles que me metió mio ma na mochila porque con tantes bromes y ente´l xaréu dábame la fame.
- A ver, ¡Callái¡ y a lleer el mensaxe d´esi lletreru.
D´estos nun hai que se fiar- diz la xefa d´estudios a la mayestra. Decíalo polos que pinten los carteles de los indicadores.
Naser y yo mexábemonos de risa, porque Fran quitó les botes y de tanto andar ente la nieve tenía un furacu nel calcetu.
La mayestra alcordóse que nel institutu dieron unes tarxetes pa que les repartiera ente los alumnos. Teníamos que dibuxar tolo que díbamos viendo y pal meyor había un premiu d´un billete d´avión pa dir de viaxe al Amazonas.Garré a Naser del brazu y dixi: refresca´l güeyu que se fina la expedición. Fuimos baxamos despacio, agarraos unos d´otros y taben hasta los paxarinos xelaos.
María xubió la mochila al costazu y agarrose de la xefa d´estudios que yá taba tiesa. Cuando llegamos abaxo l´autobús nun apaecía, nun taba aparcáu nel sitiu, sólo taba un camión de la basura.
El día d´espedición acabóse con un xofer vistíu de Papá Noel, pero ensin trinéu.
Y colorín, coloráu esti cuentu navideñu yá ta acabáu.

Marcos Vázquez Prada ( 2 ESO)

EL SUAÑU DE ROSA

Taba a puntu de llegar la Navidá, quedaben sólo unos díes pa les vacaciones, pero a Rosa quedaba-y tovía por facer un esame de ciencies:“ L´osu pardu ye un animal en peligru d´estinción…” empecipiaba diciendo la lleición.

Yera una tarde fría y lluviosa y a Rosa nun-y apetecía estudiar, asina que foi a la cocina, preparó un bocadillu de chorizu y garró una casadiella, dempués volvió al so cuartu cola merienda, prendió l´ordenador y entró nel messenger.¡ Qué bien¡ Ana, la so meyor collacia, taba conectada. Nun momentu de la conversación Ana entrugó-y que pidía a los Reis Magos, Rosa contestó-y que lo que más-y prestaría sería ver a Fernando Alonso y qu´ésti-y firmara un autógrafu. Sin dase cuenta Rosa empecipió a suañar despierta.

Rosa taba nun llugar estrañu, tenía un billete d´avión na mano y una moza indicába-y una puerta, paecía un aeropuertu. Poco dempués alcontrábase nun avión mui pequeñu y al so llau taben los tres Reis Magos: Melchor, Gaspar y Baltasar. Yeren unos señores mui vieyos y amables, esplicáron-y que diben ver a Fernando Alonso.¡ Qué nerviosa taba Rosa¡ paecía tener pulgues por tol cuerpu, nun paraba de movese y revolvese pa tolos llaos. Pela ventanilla del avión víense carrascos descomunales coles sos bolines roxes, adornaos con lluces, entós Rosa diose cuenta que nun traía zapatos y tenía un furacu nun calcetu,¡ qué desgracia¡ asina nun podía dir ver a Fernando Alonso. Nun lo pensó dos vegaes y tiróse pela puerta d´emerxencia al vacíu. Rosa caía y nun podía parar, taba muerta mieu, pero por suerte cayó enriba d´un camión de basura que la amparó. Pa la so sorpresa´l camión conducíalu Fernando Alonso que-y dixo que tenía que dir a estudiar. Entós Rosa volvió en sí, apago l´ordenador y púnxose a estudiar.
El día de Reis nun recibió a Fernando Alonso en casa, pero sí un par de calcetos nuevos y munchos regalos más poles bones notes que sacara.

Isabel García ( 3 ESO)

L´OSU GRISÓN

Yérase una vez un osu pardu que vivía debaxo d´un carrascu. Llamábase Grisón y yera mui guapu. Llevantábase de males pulgues y comía una caxa de casadielles pa desayunar. Prestába-y abondo la fórmula 1 y yera forofu de Fernando Alonso. Tolos domingos qu´había carrera sentábase xunto al carrascu y poníase a comer un bocadillu de chorizu ( que-y prestaba cuasi más que´l miel).

El problema que tenía ye que se sentía mui solu y pensaba que nunca alcontraría una familia, lo que lu ponía mui atristayáu. Una mañana llegó un cuervu con un mensaxe pa él: “ Dientro dos selmanes tolos osos del valle tendrán que facer un esame de ciencies pa caltriar los sos conocimientos”. L´osu punxose a buscar ente tolos llibros sobre too el del Valle de Peñamayor, yá qu´esi yera´l so valle y les entrugues podrían ser al rodiu d´él.

Dempués falo colos páxaros pa ver si podíen merca-y un billete d´avión al valle central, yá que si diba caminando tardaría una selmana y namás tendría una selmana pa preparar l´esame. Al otru día Wolf, el páxaru más grande del valle, díxo-y que nun-yos quedaben billetes, pero qu´un amigu suyu tenía un camión de la basura que pasaba pel valle central toles selmanes.

¡ Perfeutu¡ pensó l´osu, asina podré tar equí estudiando hasta´l día enantes del esame. Namás llegar al esame cruzase con una osuca que-y rompió ´l corazón. Yera pequeñuca, col pelu marrón claro y tenía les pates col pelu blanco. Nel esame tuvo tol tiempu mirando pa ella, y de xemes en cuando, ella echába-y una güeyaduca. Nel esame Grisón abrió un furacu nel calcetu y entamó a sacar “ chuletes”.

Al acabar l´esame entamaron a falar:
-¿Cómo te llames?- preguntó ella.
- Grisón, Gris pa los amigos, ¿ y tu?
- Sindi. Tuvi fixándome en ti y yes mui valiente al atrevete a sacar les “chuletes”.
- Non, la costume xaxaxa…… y siguieron falando.
Pela mañana apaeció una fueya coles notes:

Rufi: 5,5 Striner: 8,1
Sindi: 4 Grisón: 8,4
Claus: 7,3 Canut: 4,1
Copito: 4,2

La llista traía un asteriscu abaxo que dicía esto:
“ Tolos exemplares que suspendieron deberán dir a vivir al valle central, sacante los que tenga familia nesti valle”.
-¡ Bien¡, glayó Grisón, podré quedame en casa.
Pero Sindi taba atristayada, tendría que colar.
-¡ Nun marches, por favor¡ Necesítate equí, dixo Grisón.
- Enxamás tuvi tan enamoráu y quiero pasar tola vida contigo.
- ¿ Tas seguru? Entrugó-y ella con una sonrisa rellumante.
- Sí.
Al final volvieron los dos xuntos al carrascu de Grisón y foron felices pa siempre.

Luis Rivaya Sánchez ( 3 ESO)

PERIÓDICU " IESO Q ? "

2005-12-29T12:29:00.000+01:00

IESO Q ? : Revista del Institutu d´Educación Secundaria Obligatoria de Nava.

Los alumnos de Sociedá, Cultura y Relixón de 4° d ´ESO formen l´equipu de redaición de la revista del centru, quieren danos a conocer aquellos momentos más prestosos de les actividaes complementaries y estraescolares que se faen nel nuestru Institutu, poneos al día de proyeutos, acontecimientos presentes nel Centru, amás de conocer otres collaboraciones.
L´oxetivu final ye llograr una revista con muncha participación, una revista onde tola comunidá educativa participe tanto en llingua castellana como en llingua asturiana y asina vemos como los escolinos de Llingua asturiana y Lliteratura participaron faciendo artículos rellacionaos col cine, cola Navidá y con artículos d´opinión personal.

CINE

“ FELIZ NAVIDÁ ”

En 1914 estalló la I Guerra Mundial, que foi en poques selmanes la mayor carnicería de la hestoria de la humanidá. Al llegar la Navidá, un pastor escocés, un llugarteniente francés, un tenor alemán y una soprano danesa qu´ aprovechando la nueche de Nuechebuena de 1914, acuden a dar ánimos a les sos tropes, alcuéntrense en mediu d´un episodiu de fraternización ensin precedentes ente soldados alemanes, franceses y británicos, que dexarán el fusil no fonderu de les sos trincheres pa dir ver al soldáu vecín, da-y la manu, intercambiar con él un cigarrillu o chicolate y desea-y una "Feliz Navidá". Una tregua inesplicable que tuvo llugar na realidá.

“ LES CRÓNIQUES DE NARNIA”

La hestoria ye sobre cuatro hermanos: Lucy, Edmund, Susan y Peter, que durante la
II Guerra Mundial descubren el mundu de Narnia, al que lleguen gracies a un armariu máxicu mientres xueguen al escondite na casa de campu d´un vieyu profesor. En Narnia hai un mundu enllenu d´animales que falen, trasgos y xigantes al que la Bruxa Blanca condenó al iviernu eternu. Cola ayuda del lleón Aslan, el noble soberanu , los neños llucharán pa vencer el poder que la Bruxa Blanca tien sobre Narnia nuna batalla perimportante y asina salvalos de la maldición del fríu.

Canciu: Los tres reis.

Enriba tres camellos,
y fartucos de ñeve,
baxen de les montañes
tres reis del oriente.

De nueche , los tres magos,
mientres los neños duermen,
entren peles ventanes
a trae-yos los xuguetes.

Nun dexen ná nel platu
nin saltes más a peres,
qu´ellos, per un furacu,
ven lo que fai la xente.

El vieyu ye Melchor,
el prietu Baltasar,
y el del camellu coxu,
que va en medio,ye Gaspar.

LOS CHIGRES DE NAVA

Nestos momentos l´ambiente de Nava ye un pocu sosu, les actividaes son monótones y agora que fai tantu fríu que meyor que metese a tomar dalgo nun bar pa poder tar calentinos.
A eso vamos namás que queden en Navan tres sitios afayadizos pa los chavales:

- Limbo
- Tobogán
- Mayfer

El primeru abre a les siete y ye pa dir un vienres a echar un fubolín y tar tranquilu; el segundu ye más movíu, ye onde la xente va tomar unos cacharrinos y conseguir regalos nes fiestes; y pa finar, el terceru ye ´ meyor, ellí pues xugar al billar, al fubolín, tomar tranquilu un café o lo que tu quieras, amás tien la meyor camarera de toes.

B. Alvarez Sánchez 4 A

TAMIÉN TENEMOS DRECHU

Los escolinos de llingua asturiana tienen drechu a facer y dir una selmana de viaxe, lo mesmo que los escolinos de francés, que van una selmana a Francia nos cursos de 2° y 3°. ¿Ye que los escolinos d´asturianu son peores? ¿Nun tienen drechu?. Dichos alumnos sólo piden dir una selmana a dalgún pueblín asturianu onde haya un albergue onde conocer bien les costumes asturianes. ¿Nun quieren los asturianos que la llingua sea oficial? Entós,¿ por qué discriminen a los alumnos d´asturianu?

P. García, I. García, I. Ordoñez 3°

" LLIBRU PRESTOSU PA LLEER "

2005-12-29T10:21:00.000+01:00

Autor: Rafael Cascudo Noceda
Títulu: Xunta de mitos Edición: Academia de la Llingua Asturiana, col. Escolín númb. 55, Uviéu, 2003.

Traductor: Xosé Miguel Suárez Fernández.

Illustrador: Alberto Álvarez Peña. Llargor: 46 páxs.

Edá: 10 –13 años.

UN HOMENAXE A LA MITOLOXÍA ASTURIANA.

¿Qué pasaría si los homes marinos y los cuélebres, los pesadiellos y los trasgos, los xigantes y los busgosos decidieren axuntase la Nueche de San Xuan? ¿Asustaría l’home del sacu a les serenes? ¿Tronaría’l Nuberu? ¿Atacaría l’home llobu a les probes xanes? L’autor d’esti cuentu escritu y espublizáu orixinalmente en gallego-asturianu, Rafael Cascudo, aconceya a los personaxes mitolóxicos asturianos na playa d’A Ribeiría, en Tapia, pa tratar una cuestión que los tien peresmolecíos: ello ye que los mitos asturianos “dexaron de tar en boca de la xente”, y los neños yá nun creen nellos. Cola sida d’esti argumentu, Cascudo fai la so personal reivindicación de la fantasía, na llinia de delles alegoríes clásiques de la lliteratura infantil, como Peter Pan o La hestoria interminable; solo que, nesti casu, la historia asítiase nun ámbitu local y reconocible. Polo qu’enseña esti cuentu, equí, el problema de la supervivencia de los mitos nun tien que ver namás cola perda de la inocencia y la imaxinación; por dicilo d’un mou pedante, nel casu d’Asturies lo qu’hai ye un problema d’aculturación. Como diz Xulián, l’únicu humanu qu’asiste a la xunta de los mitos, “Namás falta que los asturianos y asturianes empiecen a mirar polo suyo, porque (...) nun se dan cuenta de lo impresionante de la so historia, de la so cultura milenaria y de les sos tradiciones, tan poderoses”. Alegoríes aparte, el llibru, que tien unes illustraciones guapísimes, fai una presentación amena y espresiva de los distintos mitos asturianos que vien a complementar otres aportaciones recientes al tema pervaloratibles, como Gene de Joaquín Fernández García (Trabe, 1998) y Xanes, trasgos y dalgunos mitos más de Mª Luz Pontón (KRK, 2002); o, pensando nun públicu de más edá, Los dioses derrotaos de Xuan Xosé Sánchez Vicente y Xesús Cañedo (Trabe, 2000), que ta recién editáu en castellanu col títulu de El gran libro de la mitología asturiana, o Mitos y lleendes asturianes d’Alberto Álvarez Peña (Picu Urriellu, 2003), que tamién tien edición n’español.

SALIDA ESCOLAR

2005-12-28T12:52:00.000+01:00

VISITA AL MUSÉU DE LA MINERÍA.

Gracies al Proyeutu Perdayuri los escolinos de Llingua asturiana y lliteratura visitaron el muséu de la Minería y de la Industria.

Esti muséu atópase na localidá de L´Entregu, nel conceyu de Samartín del Rei Aurelio, ye ún de los conceyos asturianos de mayor tradición minera.

L´edificiu principal ta formáu por un gran cuerpu central de forma cilíndrica onde vemos la torre del castillete, visible tanto dende l´esterior como l´interior y gracies a la xaula, coneuta´l Muséu cola mina imaxen.

Hai dos naves llaterales onde tán les numberoses sales d´esposiciones y otros servicios complementarios.

Si quies ver unes semeyes de la visita, pincha equí.

2005-12-28T10:21:00.000+01:00

Hola, ¿ equí tamos?

Bienveníos al canal de noticies y actividaes de la comunidá escolar del IESO de Nava. Equí apaecerán les noticies d´interés rellacionaes col centru y cola asignatura de Llingua asturiana y lliteratura.

NAVIDÁ

2005-12-20T20:15:00.000+01:00

AVISU A LOS ESCOLINOS.

Les clases finarán el 22 d´Avientu a les 12 : 15 hores y entamarán el día 9 de xineru.

Dende ´l centru educativu I.E.S.O. de Nava deséovos un añu amable y xenerosu, impaciente por brillar y enllenu d´amor, paz y esperanza.

Primer mensaxe

2005-11-21T19:41:00.000+01:00

Bienllegaos a la páxina del I.E.S.O. Nava.